«Խելացի քաղաք» նախագծի շրջանակում Աբովյանի համայնքապետարանը «Future in our hands» հասարակական կազմակերպության հետ համատեղ Աբովյանի «Զարեհ Սահակյանց»-ի անվան երաժշտական դպրոցի մոտ ստեղծեց Art Street ոճում՝ «Երաժշտական պատ»։
Ավանդական թեմայով պատկերազարդ պատը նաեւ ունի ինովացիոն լուծում՝ #ARLOOPA հավելվածի միջոցով պատկերը կենդանանում է #Կոմիտասի «Կռունկ» ստեղծագործությամբ, որը նվիրվում է Կոմիտասի 150 ամյակին։
Կայացավ «Երաժշտական պատ»-ի բացման պաշտոնական արարողությունը, որին ներկա էր Աբովյան համայնքի ղեկավար Վահագն Գեւորգյանը, համայնքապետարանի ենթակայության տակ գտնվող կրթական եւ մշակութային օջախների տնօրեններ, ժամանակակից արվեստի սիրահարներ, քաղաքացիներ։
Բացումն ազդարարվեց «Զարեհ Սահակյանց»-ի անվան երաժշտական դպրոցի ժողովրդական անսամբլը։
Համայնքի ղեկավարը նշեց, որ ամեն քայլ արվում է, որպեսզի Աբովյանը դառնա երիտասարդության մայրաքաղաք եւ նմանօրինակ նախաձեռնությունները միտված են երիտասարդ սերնդին կրթելու եւ արվեստը թվային լեզվով մատուցելու համար։
«Երաժշտական պատ» ունենալու առաջարկը «Future in our hands» հասարակական կազմակերպության ղեկավար Տիգրանուհի Ալեքսանյանինն էր, ով շնորհակալություն հայտնեց համայնքի ղեկավարին՝ երիտասարդներին մշտապես աջակցելու համար։
Նկարում պատկերված են ժողովրդական նվագարանները , քանի որ նպատակն է երիտասարդ սերնդին առավել ճանաչելի դարձնել այն։
«Երաժշտական պատ»-ը նկարազարդել է Նիդերլանդներում նմանօրինակ աշխատանքների հեղինակ՝ Կորյուն Քիթաբչյանը:
