2008 թվականի մարտի 1-2-ին հանրահավաքները ցրելու ժամանակ զոհերի ազգականներին եւ տուժածներին տրամադրվող փոխհատուցումները կարող են տարբեր լինել՝ սկսած դրամական միջոցների հատկացումից եւ ավարտած բնակարանների հատկացմամբ: Այս մասին ապրիլի 22-ին ԱԺ-ում ասաց Պետաիրավական հարցերի խորհրդարանական մշտական հանձնաժողովի նախագահ, իշխող «Իմ քայլը» դաշինքի պատգամավոր Սիսակ Գաբրիելյանը՝ «2008 թվականի մարտի 1-2-ին Երեւանում տեղի ունեցած իրադարձությունների հետեւանքով տուժած քաղաքացիներին փոխհատուցում վճարելու մասին» օրինագծի քննարկման ժամանակ պատասխանելով պատգամավորների հարցերին:
Ընդ որում՝ նա նշեց, որ այս հարցով վերջնական որոշումը կընդունի կառավարությունը: «Ասվում էր, որ այս իրադարձությունների հետեւանքով տուժածների հիմնական մասը ոստիկաններ են: Խնդիր չկա, նրանք նույնպես մեր քաղաքացիներն են, եւ եթե պարզվի, որ տուժածների հիմնական մասը բաժին է ընկնում ոստիկաններին, ապա կառավարությունը ցանկացած դեպքում պետք է մտահոգվի նաեւ նրանց մասին»,- պարզաբանեց Գաբրիելյանը՝ պատասխանելով պատգամավորներից մեկի այն դիտարկմանը, որ տուժածների զգալի մասը կազմել են ոստիկանները, որոնք հատուկ տեխնիկայի սխալ կիրառման պատճառով մեծ մասամբ իրենք իրենց են վնաս հասցրել:
Հիշեցնենք, որ 2008 թվականի մարտի 1-ին իշխանություն-ընդդիմություն դիմակայության ժամանակ զոհվել են 8 ցուցարարներ եւ Ներքին զորքերի 2 ծառայող:
Նշենք, որ օրինագծով առաջարկվում է փոխհատուցում վճարել 2008 թվականի մարտի 1-2-ին Երեւանում հանրահավաքները ցրելիս Զոհվածների ընտանիքներին: Սակայն փոխհատուցում կստանան ոչ միայն զոհվածների հարազատները, այլեւ ծանր եւ միջին ծանրության վնասվածքներ ստացած քաղաքացիները:
