ԱԺ ԲՀԿ խմբակցությունը կողմ է քվեարկելու «2008 թվականի մարտի 1-2-ին Երեւանում տեղի ունեցած իրադարձությունների ժամանակ անձանց կյանքին կամ առողջությանը պատճառված վնասների հատուցման մասին» ՀՀ օրենքի նախագծին: Այս մասին այսօր՝ ապրիլի 22-ին լրագրողների հետ զրույցում հայտարարեց ԲՀԿ խմբակցության պատգամավոր Միքայել Մելքումյան. «Հարցը վերաբերում է փոխհատուցմանը, զոհերին եւ այլն, ապա, միանշանակ, կողմ ենք քվեարկելու»,- ասաց նա:
«Իմ քայլը» խմբակցության պատգամավոր Գայանե Աբրահամյանի այն հայտարարությանը, որ Մարտի 1-ի իրադարձությունների ժամանակ արտակարգ ռեժիմ հայտարարելու որոշման պարագայում ԱԺ խմբակցության անդամները լուռ դիտորդներ են եղել, Մելքումյանը պատգամավորի այդ հայտարարության հետ համամիտ չէր: Նա նշեց, որ ստեղծվել է հանձնաժողով, տարվել են լայնածավալ քննարկումներ, որում ԲՀԿ-ի անդամ է եղել Նաիրա Զոհրաբյանը. «Ես չեմ կարծում, հենց իր պատգամավոր եղած ժամանակ շատ- շատ-շատ հարցադրումներ կատարվել են օբյեկտիվ: Ես չեմ կիսում, թե իբր եղել են դիտորդի կարգավիճակում: Այն ժամանակ էլ են քննարկվել շատ հարցեր այդ փուլի հնարավորությունների շրջանակներում՝ կապված ինֆորմացիայի հետ, եթե Դուք հետեւեք խրոնոլոգիային, կտեսնեք, որ հարցեր բարձրացվել են»,- ասաց Մելքումյանը:
