Ռուսական հեռուստաալիքները Հայաստանի տարածքում հեռարձակվում են հայաստանցի հարկատուների հաշվին։ Այս մասին ապրիլի 22-ին Ազգային ժողովում «Հեռուստատեսության եւ ռադիոյի ազգային հանձնաժողովի 2018թ․ գործունեության մասին» հաշվետվության ներկայացման ժամանակ հայտարարել է «Լուսավոր Հայաստան» կուսակցությունից պատգամավոր Արման Բաբաջանյանը՝ դիմելով հանձնաժողովի նախագահ Տիգրան Հակոբյանին։ Մասնավորապես, ինչպես նշել է Բաբաջանյանը, «ռուսական հեռուստատեսությամբ պարբերաբար Հայաստանի, նրա իշխանությունների եւ երկրում տեղի ունեցած իրադարձությունների հանդեպ ատելության քարոզչություն է իրականացվում»։
«Եւ մենք, ըստ էության, չունենք որեւէ ռեսուրսներ եւ հնարավորություններ, որպեսզի դրան դիմագրավենք։ Այդ քարոզչության մի մասն, իհարկե, վերաբերում է մեզ, սակայն մյուս մասը առնչվում է աշխարհի այլ երկրների հետ Ռուսաստանի հարաբերություններին։ Այսպես, Հայաստանի բնակիչները, ռուսական հեռուստաալիքների պրիզմայով են ձեւավորում Եվրոպական միության եւ ԱՄՆ-ի հանդեպ իրենց պատկերացումները։ Արդյունքում այդ երկրների մասին ձեւավորվում է կարծիք, որը ոչ մի ընդհանուր բան չունի մեզ հետ»,- պարզաբանել է խորհրդարանականը։
Հակոբյանն, իր հերթին, ընդունել է ընդդիմադիր պատգամավորի արտահայտած մտահոգությունը՝ հավելելով, սակայն, որ տվյալ «քաղաքական» խնդիրը կարելի է լուծել միայն իրավական դաշտի շրջանակներում։ «Աշխարհի ոչ մի երկիր թույլ չի տալիս արտասայմանյան հեռուստաընկերությունների ներառումն իր հանրային մուլտիպլեքսի հարթակ, մանավանդ՝ օտար լեզվով»,- ընդգծել է Հակոբյանը՝ հավելելով, որ այդ խնդրի լուծման համար իրենք ընդամենը մեկ տարի ունեն։ Ընդ որում, ՀՌՀ նախագահը նշել է, որ տվյալ խնդրի լուծումը չպետք է քաղաքական լարվածության պատճառ դառնա։
«Նույնիսկ ռուսական մուլտիպլեքսում չկան ալիքներ, որոնք հեռարձակվում են նրա բարեկամ երկրներից, ինչպիսին է, օրինակ, Բելառուսը։ Իսկ Ռուսաստանը բազմազգ երկիր է։ Կարծում եմ, որ մենք նույնպես դրա իրավունքը ունենք։ Դա չի սահմանափակում խոսքի ազատությունը։ Նրանք լիարժեք կարող են օգտվել համացանցի, կաբելային ցանցի եւ մասնավոր մուլտիպլեքսի ծառայություններից»,- ասել է Հակոբյանը։ Նա նաեւ հայտարարել է, որ տվյալ հարցի լուծումը նպաստում է Հայաստանի տեղեկատվական եւ լեզվական անվտանգությանը։ «Ես չեի ուզի, որ դրա մեջ քաղաքական ենթատեքստ տեսնեին, սակայն այն, այնուամենայնիվ, կա»,- ամփոփել է Տիգրան Հակոբյանը։
