Շրի Լանկայում պայթյունների գործով ձերբակալված կասկածյալների թիվը հասել է 40-ի: Այս մասին հաղորդում է Agence France-Presse-ը՝ հղում անելով Շրի Լանկայի իշխանություններին:
Մինչ այդ հաղորդվում էր 29 ձերբակալվածի մասին: Նրանց թվում, ըստ տվյալների, նաեւ ֆուրգոնի վարորդն է, որը ենթադրաբար օգտագործվել է մահապարտ ահաբեկիչների կողմից, ինչպես նաեւ տան սեփականատերը, որտեղ ապրել են նրանցից մի քանիսը:
Շրի Լանկայի անվտանգության ծառայությունները պայթյունների շարքի կազմակերպման գործով հարցաքննության համար ձերբակալել են Սիրիայի քաղաքացու: Այս մասին հաղորդում է Reuters գործակալությունը՝ վկայակոչելով աղբյուրներին:
«Ոստիկանության ահաբեկչական գործունեության հետաքննության բաժինը ձերբակալել է Սիրիայի քաղաքացուն պայթյունների շարքի կազմակերպման գործով հարցաքննության համար», -ասվում է հաղորդագրությունում: Նշվում է, որ սիրիացու ձերբակալումը կատարվել է նաեւ մյուս կասկածյալների ցուցումունբներ տալուց հետո, հաղորդում է ՏԱԱՍ-ը:
Ավելի վաղ իշխանությունները հաղորդել էին, որ Շրի Լանկայի տարածքում կիրակի կատարված պայթյունների շարքի հետեւանքով զոհերի թիվը հասել է 310-ի: Տուժածների թիվը մոտ 500 է: