Twitter միկրոբլոգում ստեղծվել է Ուկրաինայի նախագահ Վլադիմիր Զելենսկու աքաունթը, տեղեկացնում է ՈւՆԻԱՆ-ը։
«Շնորհակալություն վստահության համար, Ուկրաինա»,- ասվում է աքաունթի առաջին հրապարակման մեջ։ Ներկա պահին պրոֆիլում հավաքվել են համաշխարհային ղեկավարների, արտաքին քաղաքական գերատեսչությունների եւ ԶԼՄ-ների արձագանքի գրառումները Զելենսկու հաղթանակի մասին։ Միեւնույն ժամանակ, աքաունթը դեռ չի ստացել Twitter-ի պաշտոնական վավերացումը։ Պարզ չէ, թե արդյոք այն պաշտոնական է։
Ապրիլի 21-ին Ուկրաինայում տեղի ունեցավ նախագահի ընտրությունների երկրորդ փուլը։ Ընտրողների մասնակցությունը կազմել է 61,37 տոկոս։ ԿԸՀ-ում հայտարարել են, որ ապրիլի 30-ին կկարողանան հայտարարել ընտրությունների երկրորդ փուլի պաշտոնական արդյունքները։
Էլեկտրոնային արձանագրությունների մշակման արդյունքում նախագահի թեկնածու Վլադիմիր Զելենսկու օգտին քվեարկել է ընտրողների 73,22 տոկոսը (13 մլն 516 հազ. 124), պետության գործող ղեկավարի՝ Պյոտր Պորոշենկոյի օգտին՝ 24,46 տոկոսը (4 մլն 515 հազ. 132)։ Անվավեր է ճանաչվել 2,31 տոկոս քվեաթերթիկ։