Զատկի տոների ժամանակ Շրի Լանկայում տեղի ունեցած հարձակումների շարքը պատասխան էր Նոր Զելանդիայի Քրայսթչըրչ քաղաքի մզկիթների վրա հարձակումներին: Երկրի խորհրդարանում, մեկնաբանելով հետաքննության առաջին արդյունքներն, այս մասին ասել է Շրի Լանկայի պաշտպանության նախարարի տեղակալ Ռուվեն Վիեվարդենեն, հաղորդում է DW-ն:
Քրայսթչըրչում մարտի 15-ին հարձակում էր կատարվել իրարից մոտ 5 կմ հեռտավորության վրա գտնվող երկու եկեղեցիների վրա: Ավստրալիայի 28-ամյա քաղաքացի, աջ ծայրահեղական Բրենտոն Տարանտը թաքնված տեսախցիկով նկարահանել էր հարձակումը եւ համացանցում ուղիղ հեռարձակում իրականացրել: Ահաբեկչության արդյունքում 50 մարդ էր զոհվել: Ոստիկանությունը նույն օրը ձերբակալել էր Տարանտին, ավելի ուշ նրան սպանության մեղադրանքներ էին ներկայացվել:
Զատկի կիրակի Կոլոմբոյի 3 հինգ աստղանի հյուրանոցներում, ինչպես նաեւ երեք կաթոլիկ եկեղեցիներում պայթյունները գրեթե միաժամանակ էին տեղի ունեցել: Դրանք բոլորը կատարվել էին մահապարտների կողմից, որոնք Շրի Լանկայի քաղաքացիներ էին:
Ահաբեկչությունների հետեւաքնով մահացել է առնվազն 321 մարդ, մոտ 500-ը տարբեր ծանրության վնասվածքներ են ստացել: Մահացածների թվում 32 օտարերկրացի կա, նրանք ԱՄՆ-ի, Մեծ Բրիտանիայի, Գերմանիայի, Պորտուգալիայի, Չինաստանի, Նիդերլանդների,Բելգիայի, Թուրքիայի, Ճապոնիայի, Հնդկաստանի, Բանգլադեշի եւ Պակիստանի քաղաքացիներ են:
Շրի Լանկայի կառավարությունը պայթյունների շարքի համար պատասխանատու է համարել տեղական «Ջամաթ ալ-Թաուխիդ ալ-Վաթանիա» («Ազգային միասնություն», NTJ) իսլամիստական խմբավորմանը: