Հայոց ցեղասպանության ճանաչման իրացումն առնչվում է շատ խնդիրների հետ, նաեւ արխիվային ուսումնասիրությունների, փաստերի, որովհետեւ իրավունքը էմոցիա չի սիրում: Այս մասին, այսօր՝ ապրիլի 24-ին, Ծիծեռնակաբերդի հուշահամալիրում լրագրողների հետ զրույցում նշեց Բարձրագույն դատական խորհրդի նախագահ Գագիկ Հարությունյանը:
Նրա խոսքով, պետք է լինեն հստակ փաստեր, փաստարկներ, այդ թվում սեփականության իրավունքի հետ կապված. «Կան սեփականության իրավունքի տարբեր ասպեկտներ՝ անհատի սեփականության իրավունք, հավաքական սեփականության իրավունք: Այդ ուսումնասիրության զգալի մասը վերաբերում է նաեւ սեփականության իրավունքին: Այստեղ խնդիրն այն է, թե ինչ փաստաթղթեր, ինչ հիմքեր, ինչ հիմնավորումներ կան եւ ինչպես պետք է բարձրացնել հարցը, ով է համարվելու իրավահաջորդ եւ ինչպես է բարձրացվելու այդ հարցը, որպեսզի հնարավոր հետագա լուծումները կանխատեսելի լինեն»,-ասաց Հարությունյանն ու հավելեց. «Ցանկացած քայլ, որը կարող է բերել հնարավոր ձախողման, կլինի շատ վտանգավոր նախադեպ: Այստեղ պետք է զգույշ գործել»:
