Մենք պետք է միավորենք մեր ջանքերը Հայոց ցեղասպանության ճանաչման հարցում։ Այս մասին լրագրողների հետ զրույցում ապրիլի 24-ին Ծիծեռնակաբերդում ասել է «Հայ-քրդական բարեկամության կազմակերպության» ղեկավար Էմին Մամրիշը։
Նրա խոսքով՝ հայ եւ քուրդ ժողովուրդները պետք է աշխատեն միասին Ցեղասպանության ճանաչման հարցում։ «Հայ եւ քուրդ ժողովուրդները բազմաթիվ նմանություններ ունեն։ Մենք նույն ճանապարհն ենք անցել։ Անհրաժեշտ է մշտապես բարձրացնել Հայոց ցեղասպանության ճանաչման հարցը միջազգային մակարդակով»,- նշել է նա։
Էմին Մամրիշը հավելել է, որ իրենք աշխատում են հայ-քրդական հարաբերությունների ամրապնդման ուղղությամբ, որն իրականացնում են Իրաքյան Քրդստանի խորհրդարանի պատգամավորների հետ միասին։ «Հայաստան գալիս եմ արդեն վեցերորդ անգամ։ Ամեն տարի մենք պատվիրակություն ենք ուղարկում, որը մասնակցում է հիշատակի արարողություններին։ Այս անգամ պատվիրակության կազմում է Չամչալի քաղաքապետը, ինչպես նաեւ հասարակական գործիչներ, այդ թվում՝ գրողներ ու հրապարակախոսներ, որոնք զբաղվում են ցեղասպանության հարցերով»,- ամփոփել է նա։