«DW»-ն հրապարակել է տեսանյութ Ֆրանսիայում ծնված Աստրիդ Արթին-Լուսինյանի մասին, որի տատիկն ու պապիկը վերապրել են Հայոց ցեղասպանությունը։ Աստրիդի խոսքով՝ դեռ պատանի տարիքում նա հետաքրքրվել է իր նախնիների պատմությամբ։
«Պապս միշտ պատմում էր այն գյուղի մասին, որտեղ ապրել են ցեղասպանությունից առաջ։ Նրանք թողել են գյուղը անարդարության զգացումով՝ բախվելով բռնության հավաքական տեսակին։ Այդ զգացողությունը փոխանցվել է եւ ինձ»,- նշել է նա։
«Պապերիցս մեկը հասցվել է համակենտրոնացման ճամբար։ Նա այնտեղից դուրս է եկել եւ հաջորդ չորս տարիներն անցկացրել երկրեերկիր թափառելով, իսկ Ֆրանսիա եկել է 1924 թվականին»,- ավելացրել է նա։
Աստրիդը հնարավոր ամեն բան արել է, որպեսզի գտնի ավելի շատ տեղեկատվություն իր անցյալի մասին։ Նա պատմության ուսուցիչ է եւ կամավոր մի կազմակերպությունում, որը տեղեկատվություն է հավաքում վերապրած հայերի մասին, բայց դա նրա համար «պայքար է հանուն արդարության»։
«Դա օգնում է հավաքել սեփական պատմության պակասող փազլները։ Մեր պարտքն է հավաքել ապացույցներ, թե ինչ է տեղի ունեցել։ Մանավանդ այն ժամանակ, երբ Թուրքիան դեռ ժխտում է Հայոց ցեղասպանությունը»,- նշել է նա։
Նրա խոսքով՝ քանի որ Ֆրանսիան պաշտոնապես ապրիլի 24-ը ընդունել է որպես Հայոց ցեղասպանության զոհերի հիշատակի օր, շատ կարեւոր է, որ այս իրադարձությունը Ֆրանսիայում հիմա ունի իրավական հիմք, բայց Ֆրանսիան, ինչպես եւ ԵՄ անդամ մյուս պետությունները, պետք է ստեղծեն օրենքներ, որոնց համաձայն՝ Հայոց ցեղասպանության ժխտումը կդառնա անօրինական։