Սաուդյան Արաբիան չի ծրագրում մոտ ժամանակներս մեծացնել նավթի արդյունահանումն այն բանից հետո, երբ ԱՄՆ-ը լիակատար արգելք է սահմանել իրանական նավթի ներկրման վրա։ Այս մասին հայտնել է էներգետիկայի նախարար Խալիդ Ալ Ֆալիհը՝ հայտնում է AP-ը։
«Նավթի գլոբալ պահուստները շարունակում են աճել՝ չնայած այն բանին, ինչ տեղի է ունենում Վենեսուելայում եւ չնայած Իրանի դեմ պատժամիջոցների խստացմանը»,- Էր Ռիադում ֆինանսական համաժողովի ժամանակ ասել է Ֆալիհը։
Նրա մեկնաբանությունները հնչել են այն լուրերի ֆոնին, որ աշխարհում նավթի խոշորագույն արտահանող թագավորությունը կարող է ավելացնել նավթի արդյունահանումը, որպեսզի լրացնի բացը, որ առաջացել է իրանական նավթի ներկրման արգելքից հետո։
Նրա խոսքերով, թեեւ երկիրը չի ծրագրում մոտ ժամանակներս մեծացնել նավթի արդյունահանումը, Էր Ռիադը ձգտում է հավասարակշռել նավթի շուկան։ Երկրները, որոնք ուզում են փոխարինել իրանական նավթը, «գիտեն, թե որ համարով պետք է զանգեն»՝ ասել է նա։
Ինչպես տեղեկացվել էր նախկինում, ԱՄՆ վարչակազմը պաշտոնապես հայտարարել է, որ չի երկարաձգի իրանական նավթի ներկրման պատժամիջոցներից ազատելու ժամկետը։ Նշենք, որ պատժամիջոցներից ազատման ժամկետը, որը ստացել էին Չինաստանը, Հունաստանը, Հնդկաստանը, Իտալիան, Ճապոնիան, Հարավային Կորեան, Թայվանը եւ Թուրքիան, լրանում է մայիսի 2-ին։