Ամերիկայի Միացյալ Նահանգների նախագահ Դոնալդ Թրամփը հայտարարություն է տարածել Հայոց ցեղասպանության 104-րդ տարելիցի կապակցությամբ՝ կրկին չօգտագործելով «Ցեղասպանություն» եզրը:
«Այսօր մենք հարգանքի տուրք ենք մատուցում Մեծ Եղեռնի զոհերի ու բոլոր նրանց հիշատակին, որոնք տառապել են 20-րդ դարի ամենասարսափելի զանգվածային կոտորածների պատճառով: 1915 թվականից սկսած՝ Օսմանյան կայսրության վերջին տարիներին մեկ ու կես միլիոն հայեր աքսորվեցին, սպանվեցին կամ մահվան երթի ուղարկվեցին: Հիշատակի այս օրը մենք կրկին միանում ենք Ամերիկայի ու ողջ աշխարհի հայերին եւ սգում բազմաթիվ զոհերի հիշատակը:
Այս օրը մենք նաև հիշում ու մեր երախտիքն ենք հայտնում այն մարդկանց, որոնք փորձեցին վերջ տալ բռնությանը, ինչպես նաև նրանց, որոնք ձգտեցին անել այնպես, որ նմանօրինակ չարագործություններն այլևս երբեք չկրկնվեն, ինչպես իրավապաշտպան և իրավաբան Ռաֆայել Լեմկինը:
Մենք հիշում ենք մեծահոգի ամերիկացիների ներդրումը, որոնք օգնեցին փրկելու կյանքեր և վերակառուցելու հայկական համայնքները: Հիշելով բոլոր նրանց, որոնք տառապեցին, մենք նաև ոգեշնչվում ենք այն քաջ և տոկուն հայերից, ովքեր ի հեճուկս հսկայական դժվարությունների, ստեղծեցին կենսունակ համայնքներ ողջ աշխարհում, այդ թվում և Միացյալ Նահանգներում:
Մենք պարտավորվում ենք սովորել նախկին ողբերգություններից, որպեսզի չկրկնենք դրանք: Մենք ողջունում ենք հայերի ու թուրքերի ջանքերը՝ ճանաչելու և հաշվի առնելու իրենց ցավալի պատմությունը: Մենք կանգնում ենք հայ ժողովրդի կողքին՝ հիշելու Մեծ Եղեռնի ընթացքում կորսված կյանքերն ու վերահաստատելու ավելի խաղաղ աշխարհ կառուցելու մեր հանձնառությունը»: