«Իմ քայլը» դաշինքից պատգամավոր Հայկ Գեւորգյանը նվազագույնն անազնիվ էր փաստերը ներկայացնելիս: Այս մասին ապրիլի 25-ին ԱԺ-ում ավանդական ճեպազրույցների ժամանակ ասաց «Բարգավաճ Հայաստան» կուսակցության պատգամավոր, ԲՀԿ առաջնորդ Գագիկ Ծառուկյանի մամուլի քարտուղար Իվետա Տոնոյանը՝ մեկնաբանելով «Արարատցեմենտ» ընկերության շուրջ բանավեճերը:
Նա, մասնավորապես, հիշեցրեց, որ Հայկ Գեւորգյանը խորհրդարանի ամբիոնից ելույթ ունենալիս հայտարարեց այն մասին, որ այս ձեռնարկությունը Ծառուկյանը ձեռք է բերել 200 հազար դոլարով: «Առուվաճառքի պայմանագիրը ձեռքիս է, եւ դուք կարող եք ինքներդ ամեն ինչում համոզվել: Գեւորգյանը հիշատակում է միայն երկրորդ կետը, որի համաձայն 200 հազար դոլարը հատկացվել է միայն սեփականաշնորհմանը, սակայն չի հիշատակում երրորդ կետը, որին հետեւում են մնացյալ բոլոր ֆինանսական հարցերը, մասնավորապես՝ ձեռնարկության կուտակած պարտքի մարումը, որը կազմում էր 6 մլն 866 հազար դոլար եւ այլն: Իսկ ընդհանուր առմամբ, սեփականաշնորհման ամբողջ գործընթացը արժեցել է ավելի քան 10 մլն դոլար՝ հաշվի առնելով ապրանքի արժեքը եւ մնացած ծախսերը: Մենք դեռ չենք խոսում ներդրումային ծրագրերի մասին, որոնք կիրականացվեն ապագայում եւ կարժենան 6,2 մլրդ դրամ»,- նշեց Տոնոյանը: