Հյուսիսային Կորեայի առաջնորդ Կիմ Չեն Ընի թիկնապահները սպիրտով մաքրել են աթոռը, որին նա պատրաստվում էր նստել Ռուսաստանի նախագահ Վլադիմիր Պուտինի հետ հանդիպումից առաջ։ Ականատեսները դա նկարահանել են տեսանյութով, որը հրապարակել է Telegram-ալիք Life Shot-ը, տեղեկացնում է Lenta-ն։
Կադրում մուգ բաճկոնով տղամարդը անձեռոցիկով մաքրում է աթոռի թիկնակները, ոտքերն ու նստելատեղը։ Հրապարակման հեղինակները ենթադրել են, որ անձեռոցիկը սպիրտով էր, եւ դրանով վարակազերծել են աթոռի մակերեսը։
Կիմ Չեն Ընի եւ Վլադիմիր Պուտինի հանդիպումը տեղի է ունեցել Հեռավորարեւելյան դաշնային համալսարանի ուսանողական քաղաքում (Ռուսկի կղզի)։ Սա Հյուսիսային Կորեայի առաջնորդի առաջին այցն է Ռուսաստան։