Մեր խմբակցությունը դեմ է ցեմենտի ներմուծման համար մաքսատուրքի սահմանման մասին օրինագծին: Այս մասին ապրիլի 25-ին ԱԺ-ում ավանդական ճեպազրույցների ժամանակ ասաց «Լուսավոր Հայաստան» կուսակցության եւ խորհրդարանական խմբակցության ղեկավար Էդմոն Մարուքյանը՝ մեկնաբանելով «Արարատցեմենտ» ընկերության շուրջ իրավիճակի բանավեճերը, որի սեփականատերն է «Բարգավաճ Հայաստանի» ղեկավար, օլիգարխ Գագիկ Ծառուկյանը:
Նրա խոսքով՝ այս քայլը կարող է հանգեցնել Հայաստանում շինարարական ծախսերի աճի, եւ ըստ էության՝ շուկայի ազատականացման հարցում լուրջ խնդիր դառնալ: «Սա ավարտուն օրինագիծ չէ՝ զուրկ խորը քննարկումներից: Մենք առաջարկեցինք լայն բանավեճ կազմակերպել, այնուհետեւ նաեւ նոր հարցեր առաջադրել»,- պարզաբանեց Մարուքյանը: Նրա կարծիքվ՝ գոյություն ունի նաեւ այս օրինագծի հետ կապված շահերի խնդիր:
Հիշեցնենք, որ Հայաստանի խորհրդարանն 1-ին ընթերցմամբ հավանություն է տվել օրինագծին, որով տոննայի դիմաց 22 հազար դրամ մաքսատուրք է սահմանվում Իրանից եւ այլ երկրներից ներմուծվող ցեմենտի համար: Սակայն այն չի գոհացրել «Բարգավաճ Հայաստան» կուսակցության պատգամավորներին, որոնք պահանջել են մաքսատուրք սահմանել նաեւ կլինկերի ներկրման համար: Այս առաջարկն, իր հերթին, հարուցել է իշխող «Իմ քայլը» դաշինքի պատգամավորների դժգոհությունը, որոնք դրա մեջ նկատել են շուկայի մենաշնորհման ակնառու փորձ:
