Կանադայի իշխանությունները Facebook-ին սպառնացել են գաղտնիության տեղական օրենքները խախտելու եւ օգտատերերի մասնավոր տեղեկատվությունը պաշտպանելու ոչ բավարար միջոցների համար՝ հայտնում է ՌԻԱ Նովոստին՝ հղում կատարելով Կանադայի գաղտնիության վարչության հայտարարությանը։
Կանադայի մասնավոր տեղեկատվության պաշտպանության հավատարմատարի հետաքննությունը Facebook-ի հանդեպ սկսվել է այն բանից հետո, երբ հայտնի է դարձել, որ 87 միլիոն օգտատերերի տվյալները անօրինական կերպով փոխանցվել են բրիտանական Cambridge Analytica խորհրդատվական ընկերությանը։
Facebook-ի այն գործողությունների վերաբերյալ վարչության հետեւությունները, որոնք, կանադական իշխանությունների գնահատականով, «հրաժարվում է լուծել կամ գոնե խոստովանել» սոցցանցը, հրապարակվել են հաստատության կայքում։
«Կանադայի մասնավոր տեղեկատվության պաշտպանության հավատարմատարի գրասենյակը պլանավորում է բարձրացնել այս խնդիրը դաշնային դատարանում, որպեսզի ստիպի ընկերությանը ուղղել քաղաքականությունը անձնական տեղեկատվության հանդեպ»,- ասվում է հրապարակված հայտարարության մեջ։
«Հավատարմատարի խորհրդատվությունն ընդունելու Facebook-ի մերժումը նշանակում է, որ գոյություն ունի կանադացիների անձնական տեղեկատվությունը առանց նրանց գիտության պոտենցիալ վտանգի ենթարկելու մեծ ռիսկ»,- ասվում է հայտարարության մեջ։
Ավելի քան մեկ տարի առաջ Facebook-ը խոստովանել էր, որ սոցցանցի 87 միլիոն օգտատերերի տվյալները, մասնավորապես՝ ԱՄՆ-ում, սխալմամբ փոխանցվել են Cambridge Analytica ընկերությանը։ New York Times-ը հայտնել է, թե Cambridge Analytica-ը, որն օգտագործել է տվյալների խորը վերլուծության տեխնոլոգիաները համացանցում ընտրական քարոզչությունների ընթացքում ռազմավարական կապերի համար, նախընտրական շրջանում համագործակցել է Դոնալդ Թրամփի հետ։ Հավաքված տվյալների վրա հիմնվելով՝ մասնագետները գնահատել են ընտրողների քաղաքական նախապատվությունները եւ ցույց են տվել նրանց գովազդներ, որոնք համապատասխանել են նրանց հետաքրքրությունների շրջանակին։ Բարձրացած աղմուկը հանգեցրել է նրան, որ Facebook-ի ղեկավարը ստիպված էր տեղի ունեցածի վերաբերյալ պատասխաններ տալ Կոնգրեսում։
Դրանից հետո ամերիկյան մի շարք հաստատությունների եւ ԱՄՆ Կոնգրեսի գծով սկսվել են հետաքննություններ՝ կապված օգտատերերի տվյալների արտահոսքի հետ։ Մասնավորապես, հետաքննություն է սկսվել ԱՄՆ Առեւտրի դաշնային հանձնաժողովի կողմից։