Շրի Լանկայում ուրբաթ մոտ 10 հազար զինծառայողներ են տեղակայվել մզկիթների եւ այլ կրոնական վայրերի մոտ: Reuters գործակալությունը հայտնում է, որ իշխանությունները վախենում են հնարավոր ահաբեկչություններից կիրակնօրյա պայթյուններից հետո, որոնց հետեւանքով, վերջին տեղեկություններով, զոհվել է շուրջ 250 մարդ:
Նախօրեին Շրի Լանկայի մուսուլմանական կրոնական հարցերով նախարար Աբդուլ Խալիմ Մոհամմեդ Հաշիմը կղզային պետության իսլամի հետեւորդներին կոչ էր արել ապրիլի 26-ին ավանդական ուրբաթօրյա աղոթքը չկատարել մզկիթներում, այլ դա անել տանը:
Կարդինալ Մալքոլմ Ռանջիթն իր հերթին քրիստոնյա հոգեւորականներին կոչ էր արել առայժմ պատարագներ չկատարել մինչեւ իրավիճակի բարելավումը: «Ավելի կարեւոր է անվտանգությունը»,- նշել էր հոգեւորականը:
Շրի Լանկայում ապրիլի 21-ին տեղի էր ունեցել երկրի պատմության մեջ ամենախոշոր ահաբեկչությունների շարքը: Կոլոմբո, Նեգոմբո եւ Բատիկալոա քաղաքներում ընդհանուր տեղի էր ունեցել 8 պայթյուն, այդ թվում՝ կաթոլիկ եկեղեցիներում Զատկի ժամերգության ժամանակ եւ հյուրանոցներում: Հարձակումներն իրագործել են մահապարտները, որոնք Շրի Լանկայի քաղաքացիներ էին: