Եթե ԵՏՄ տարածքում ընդհանուր էներգետիկ շուկան լիարժեք գործի, կարող է հնարավորություններ ստեղծել Հայաստանից էլեկտրաէներգիայի արտահանման ծավալների մեծացման համար: Այս մասին, այսօր՝ ապրիլի 26-ին, ԱԺ-ում լրագրողների հետ զրույցում նշել է Հանրային ծառայությունները կարգավորող հանձնաժողովի նորընտիր նախագահ Գարեգին Բաղրամյանը:
«Ինչպես նաև որոշ առումով սեզոնային ավելի էժան էլէներգիայի ներկրման հնարավորություն կստեղծի։ Ընդհանրապես, շուկաների միավորումը բերում է նրան, որ ընդհանուր շուկայի շրջանակներում ավելի շատ սպառողներ են լինում, այսինքն՝ պահանջարկը մեծանում է, արտադրության ծավալները մեծանում են, ընդհանուր շուկայի շրջանակում ավելի շատ սպառողներ են լինում։ Այսինքն՝ պահանջարկը մեծանում է, արտադրության ծավալները մեծանում են, հետևաբար, կարող է լինել էժան էլէներգիայի հոսք»,-ասաց Բաղրամյանը:
Նա օրինակ բերեց՝ նշելով, որ եթե, օրինակ, Ղազախստանում ինչ-որ սեզոնային էլեկտրական էներգիա կա, այն էժան կարող է վաճառվել Հայաստանում՝ դուրս մղելով մեզ մոտ ստիպված աշխատող ջերմակայանին:
«Կարող է լինել նաև հակառակը՝ Հայաստանը էժան վաճառի ԵՏՄ անդամ երկրներին»,- ասաց նա՝ հավելելով, որ ծավալների, փոխհոսքերի մեծության աճը եւ էժան էլեկտրաէներգիայի մուտքը կբերի իր դրական ազդեցությունը սպառողների համար:
