ՌԴ նախագահ Վլադիմիր Պուտինը մեկնաբանել է Ուկրաինայի նախագահական ընտրությունների երկրորդ փուլում հաղթած առաջնորդ Վլադիմիր Զելենսկու խոսքը՝ ռուսներին ուկրաինական անձնագրեր տալու մասին, փոխանցում է «ՌԻԱ Նովոստի»-ն:
«Իրո՞ք, այդպե՞ս է ասել: Շատ լավ է: Եթե նրանք ռուսներին քաղաքացիություն տան, իսկ մենք էլ Ռուսաստանում ուկրաինացիներին քաղաքացիություն տանք, ապա այդ դեպքում մենք աստիճանաբար կհասնենք ընդհանուր որոնվող արդյունքին, ինչի մասին եւ ես ասել եմ: Այսինքն՝ մենք կունենանք ընդհանուր քաղաքացիություն»,- լրագրողներին ասել է ՌԴ նախագահը՝ «Աշխատանքի Հերոս» մեդալները հանձնելու արարողությունից հետո:
Վլադիմիր Զելենսկին, իր հերթին, Մոսկվայի որոշումը «Ուկրաինայի քաղաքացիներին գայթակղելու» փորձ է անվանել եւ շեշտել, որ Կիեւը մտադիր է «պաշտպանել, ապաստան տրամադրել եւ ուկրաինական քաղաքացիություն տալ բոլորին, ովքեր պատրաստ են ազատության համար պայքարել»:
Հիշեցնենք, որ ապրիլի 21-ին Ուկրաինայում տեղի էր ունեցել նախագահական ընտրությունների երկրորդ փուլը: Բոլոր արձանագրությունների մշակումից հետո Զելենսկին ստացել է ձայների 73,22 տոկոսը: Քվեարկության պաշտոնական արդյունքները հրապարակվելու են ապրիլի 30-ին:
