Բիշքեկում սկսվել է ՀԱՊԿ անդամ երկրների պաշտպանության նախարարների խորհրդակցությունը: Նիստը բացել է Ղրղզստանի ԶՈՒ Գլխավոր շտաբի պետ Ռայիմբերդի Դույշենբիեւը, հայտնում է «Sputnik Ղրղզստանը»:
ՀԱՊԿ-ում այս տարի նախագահում է Ղրղզստանը: Խորհրդակցությանը մասնակցում են Հայաստանի, Բելառուսի, Ղազախստանի, Ղրղզստանի, Ռուսաստանի եւ Տաջիկստանի պաշտպանական գերատեսչությունների ղեկավարները, ինչպես նաեւ ՀԱՊԿ Քարտուղարության ներկայացուցիչներ:
«Մենք հրաշալի հնարավորություն ենք ստացել կարծիքներ փոխանակելու Կենտրոնական Ասիայում ռազմաքաղաքական իրավիճակի վերաբերյալ եւ առանցքային որոշումներ ընդունելու ՀԱՊԿ շրջանակում ռազմական համագործակցության մի ամբողջ շարք հարցերի շուրջ: Վստահ եմ, որ այսօրվա նիստը եւս մեկ դրական քայլ կդառնա սպառնալիքներին ու մարտահրավերներին հակազդելու կազմակերպության անդամների ջանքերում»,- ասել է Դույշենբիեւը:
Երկրի ԶՈՒ ԳՇ մամուլի ծառայությունից նշել են, որ նիստի մասնակիցները կարծիքներ կփոխանակեն Կենտրոնական Ասիայում մարտահրավերների եւ սպառնալիքների վերաբերյալ, կքննարկեն տաջիկա-աֆղանական սահմանին լարվածության թուլացման համատեղ գործողությունների հարցերը:
«Պաշտպանական գերատեսչությունների ղեկավարները կքննարկեն նաեւ մի շարք փաստաթղթեր, մասնավորապես՝ կառավարման մարմինների պատրաստման եւ հաջորդ տարի հավաքական անվտանգության համակարգի ուժերի ու միջոցների ստեղծման հարցերը, արտաքին քաղաքականության, անվտանգության եւ պաշտպանության հարցերով խորհրդակցությունների պլանը»,- նշված է երկրի Գլխավոր շտաբի հաղորդագրության մեջ:
Նախատեսված է 11 փաստաթղթի ստորագրում, այդ թվում՝ ՀԱՊԿ Հավաքական ուժերի նյութատեխնիկական ապահովման մասին:
