Հայաստանում իշխանափոխության խնդիր ՀՅԴ օրակարգում չկա։ Այս մասին այսօր՝ ապրիլի 30-ին, մամուլի ասուլիսի ժամանակ ասաց ՀՅԴ ԳՄ ներկայացուցիչ Իշխան Սաղաթելյանը՝ անդրադառնալով վարչապետ Փաշինյանի նկատմամբ անվստահության գործընթաց սկսելու եւ իշխանափոխության հասնելու մասին տեղեկություններին։

««Բարգավաճ Հայաստան» եւ «Լուսավոր Հայաստան» կուսակցությունների հետ այդ թեմայով քննարկում չենք ունեցել»,–ասաց նա։

ԳՄ ներկայացուցչի խոսքով՝ իրենք աշխատում են ՀՅԴ օրակարգով. «Մենք մեր բնական հունով, օրակարգով գնում ենք առաջ։ Նման հարց չունենք»,–հավելեց նա։

Հիշեցնենք, որ մամուլում տեղեկություն կար, որ դեկտեմբերին ՀՅԴ–ն կսկսի վարչապետ Փաշինյանի նկատմամբ անվստահության գործընթաց։ Քննարկվում է մանդատները վայր դնելով ճգնաժամ առաջացնելու տարբերակը, որի նպատակով ՀՅԴ–ն բանակցում է ԲՀԿ-ի եւ «Լուսավոր Հայաստանի» հետ։