Չինաստանում դատարանը մետամֆետամինի արտադրության եւ վաճառքի համար մահապատժի է դատապարտել Կանադայի քաղաքացուն։ Դա տեղի է ունեցել Պեկինի եւ Օտավայի միջեւ լարվածության ֆոնին՝ կապված Huawei Technologies-ի ֆինանսական տնօրենի կալանավորման հետ։ Կանադացի Ֆան Վեյը համարվում է թմրանյութերի արտադրության եւ առեւտրի սխեմայի իրականացման ղեկավար՝ հայտնում է Reuters-ը։
Կանադայի ԱԳ նախարար Քրիստիա Ֆրիլանդը դատապարտել է մահապատժի կիրառումը՝ այն անվանելով «դաժան եւ անմարդկային պատիժ, որը չպետք է կիրառվի ոչ մի երկրում»։
Եւս մեկ մեղադրյալ Վու Ցիպինը նույնպես դատապարտվել է մահապատժի, սակայն նրա քաղաքացիությունը չի հստակեցվում։
Դատարանը որոշում է կայացրել եւս ինը մարդու մասին, որոնց թվում են մեկ ամերիկացի եւ չորս մեքսիկացի։ Սակայն նրանց պատժի ժամկետները չեն նշվում։
Ֆանը երկրորդ կանադացին է, որ Չինաստանում այս տարի դատապարտվում է մահապատժի՝ կապված թմրամիջոցների հետ։