Չինաստանը սկսել է վիրտուալ հեռուստահաղորդավարների արտահանումը։ Ինչպես հայտնում է Hightech+-ը, չինական ինտերնետային որոնողական Sogou համակարգը մտադիր է արհեստական ինտելեկտով հեռուստահաղորդավարների արտահանում կազմակերպել։

Sogou-ն համաշխարհային ճանաչում է ստացել նորությունների վիրտուալ հաղորդավարներ ստեղծելու շնորհիվ։ Դրանցից առաջինը անցյալ տարվա նոյեմբերին հայտնվել էր «Սինխուա» գործակալության հեռուստաալիքի եթերում։ Մարտին տղամարդկանց ԱԻ-կոլեկտիվին միացել է Սին Սյաոմեն կիբեռաղջիկը։

Առաջին հաճախորդ է դարձել Արաբական Միացյալ Էմիրությունները։ Ինչպես հայտնում է South China Morning Post-ը, չինական ինտերնետային հսկան աշխարհում առաջին արաբալեզու վիրտուալ հաղորդավարին ստեղծելու պայմանագիր է կնքել ԱՄԷ-ի պետական հեռուստատեսության հետ։

Կողմերը վստահ են, որ տեխնոլոգիան թույլ կտա նորությունների հեռարձակումները ավելի որակյալ դարձնել եւ կնպաստի տարածաշրջանում մեդիաոլորտի զարգացմանը։

Չինաստանը ձգտում է մինչեւ 2030թ․ արհեստական ինտելեկտի շուկայում առաջատար դառնալ, եւ վիրտուալ հեռուստահաղորդավարների մշակումը տեխնոլոգիական զարգացման միայն մեկ օրինակն է։