Իրանը կպատասխանի ՕՊԵԿ անդամ երկրների ցանկացած սպառնալիքի: Այս մասին Իրանի նավթի նախարար Բիջան Զանգանեն հայտարարել է Թեհրանում ՕՊԵԿ գլխավոր քարտուղար Մոհամմեդ Բարկինդոյի հետ հանդիպումից հետո, փոխանցում է Shana-ն:
Նրա խոսքով՝ ՕՊԵԿ-ին Իրանի անդամակցությունը պայմանավորված է երկրի շահերով, եւ եթե կարտելի որոշ անդամներ ցանկանան Իրանին սպառնալ, ապա նա պատասխանելուց զերծ չի մնա: «Ես պարոն Բարկինդոյին ասացի, որ ՕՊԵԿ-ը որոշ անդամների միակողմանի դիրքորոշման պատճառով փլուզման սպառնալիքի տակ է, եւ այս կազմակերպությունը կարող է փլվել»:
Նախօրեին ՕՊԵԿ գլխավոր քարտուղարը հայտարարել էր, որ «անհնար» է Իրանին նավթի համաշխարհային շուկայից հանել: Պատասխանելով այն հարցին, որ ՕՊԵԿ երկու անդամներ պահանջել են իրանական նավթին այլընտրանք, նա ասել է, որ ՕՊԵԿ-ն այս հարցի վերաբերյալ կոլեկտիվ որոշումներ է ընդունում: Նրա խոսքով՝ կուսումնասիրվեն բոլոր տվյալներն ու երկրորդական աղբյուրների վիճակագրությունը, եւ հունիսին կորոշեն, ՕՊԵԿ-ն ընդհանուր առմամբ հաշվի է առնում բոլոր անդամ երկրների շահերը, որպեսզի բավարարի նավթի մատակարարումների ոլորտում առանձին անդամների պահանջարկը:
Ավելի վաղ հաղորդվել էր, որ ԱՄՆ վարչակազմը պաշտոնապես հայտարարել է, որ չի երկարացնի իրանական նավթի ներմուծման պատժամիջոցներից ազատելու ժամկետը: Նշենք, որ ներկայումս պատժամիջոցներից ազատվելու ժամկետը, որը ստացել են Չինաստանը, Հունաստանը, Հնդկաստանը, Իտալիան, Ճապոնիան, Հարավային Կորեան, Թայվանը եւ Թուրքիան, լրացել է մայիսի 2-ին:
