Հեղափոխությունից առաջ էլ մամուլը կիսով չափ ազատ էր, հիմա էլ է կիսով չափ ազատ: Այս մասին այսօր՝ մայիսի 3-ին NEWS.am-ի հետ զրույցում ասաց քաղաքագետ Աղասի Ենոքյանը, խոսելով Հայաստանում մամուլի ազատության մասին: Նրա խոսքով՝ հեղափոխությունից առաջ հիմնական ուշադրությունը սևեռած էր հեռուստաընկերություններին, իսկ հեղափոխությունից հետո թրենդային դարձան նաև կայքերը։
«Ներկայումս կան հեռուստաընկերություններ, որոնք իշխանության վերահսկողության տակ չեն: Հիմա առաջ են եկել նոր խնդիրներ, անընդհատ ֆեյք կամ իրական օգտատերերը վիրավորանքներ են հասցնում, մամուլի նկատմամբ ճնշում են գործադրում: Առաջ նման բան չկար, սա նոր երևույթ է»,- ասաց քաղաքագետը, և ավելացրեց, որ ներկայումս մամուլի միջոցով ընդդիմությունը փորձում է իր խոսքն ասել, իսկ իշխանավորները փորձում են ճնշել ու թիրախավորել մամուլը։
«Սոցիալական ցանցերը փորձում են մամուլի դերը վերցնել իրենց վրա, և դա մամուլի խնդիրներից է: Ազատ մամուլն այն է, որ որևէ քաղաքական ուժից չունի կախում, ֆինանսական աջակցության չի սպասում և որևիցե ճնշման չի ենթարկվում, իսկ Հայաստանը դեռ շատ մեծ քայլեր ունի անելու, որ հասնի ազատության այդ աստիճանին»,- ասաց նա։
Ենոքյանի խոսքով՝ հիմա հայկական մամուլը բաժանված է սևերի և սպիտակների։
«Նոր իշխանությունը իր ձևավորման ընթացքում արդեն իսկ բաժանեց սևերի և սպիտակների, որի մեջ մտավ նաև մամուլը: Սևի և սպիտակի բաժանված մամուլի պատերազմը բնական բան է»,- ասաց նա: