Ամերիկյան վարչակազմը որոշել է խստացնել իրանյան միջուկային ծրագրի նկատմամբ միակողմանի սահմանափակող միջոցառումները: Այդ մասին ուրբաթ Bloomberg գործակալությանը տված հարցազրույցում հայտարարել է Իրանի հարցով ամերիկյան հատուկ ներկայացուցիչ Բրայան Հուքն ու միջազգային անվտանգության հարցերով ԱՄՆ-ի պետքարտուղարի օգնական Քրիսթոֆեր Ֆորդը, հաղորդում է ՏԱՍՍ-ը:
«Մենք խստացնում ենք Իրանի միջուկային ծրագրի վրա տարածվող սահմանափակումները Թեհրանի վրա ճնշում գործադրելու մեր արշավի շրջանակներում,-ասել է Հուքը: Իրանը չի կարող ունենալ որեւէ ուղի միջուկային զենք ստեղծելու համար»:
Ինչպես նշված է հաղորդագրության մեջ, ԱՄՆ-ը դադարում է բացառություններ անել իր պատժամիջոցներից, որոնք թույլ են տալիս Իրանին մատակարարել իր ծանր ջրի ավելցուկը Օմանին, ինչպես նաեւ փոխանակել հարստացված ուրանը այսպես կոչված դեղին կարկանդակի հետ (անգլ.՝ yellow cake)՝ կոնցենտրատ, որը ստանում են ուրանի հանքաքարը մշակելու ընթացքում:
Ֆորդը հայտարարել է, որ ԱՄՆ-ն պահպանում են պատժամիջոցների ռեժիմից բացառությունները, որոնք վերաբերում են «Բուշեր» ատոմային էլեկտրակայանին, ինչպես նաեւ Արաքում եւ Ֆորդոյում միջուկային օբյեկտներին, սակայն կրճատում են դրանց գործունեության ժամկետը 180-ից 90 օր տեւողությամբ:
