Հայաստանում տուրօպերատորները պետք է լիցենզավորվեն, քանի որ դա կարող է նպաստել հնարավոր ռիսկերի զգալի նվազմանը: Մայիսի 6-ին լրագրողների հետ հանդիպման ժամանակ այս մասին ասաց Հայաստանի Տուրիզմի ֆեդերացիայի նախագահ Մեխակ Ապրեսյանը:

Նրա կարծիքով՝ տուրօպերատորների լիցենզավորման դեպքում շուկայում կարող է զգալիորեն մեծանալ սպասարկման որակը, քանի որ զբոսաշրջային ընկերությունները ավելի շատ կմտածեն իրենց վարկի եւ հեղինակության մասին:

Ապրեսյանն ընդգծեց, որ ըստ օրենքի՝ տուրօպերատորները զբոսաշրջիկներին եւ հանգստացողներին պետք է անհրաժեշտ ամբողջ տեղեկատվությամբ ապահովեն նախքան վերջինների հետ ծառայությունների մատուցման մասին պայմանագիր կնքելը: «Անհրաժեշտ է տուրօպերատորներից ամբողջական տեղեկատվություն պահանջել: Սա բխում է իրենց՝ զբոսաշրջիկների շահերից: Ծառայությունների փաթեթը պետք է նկարագրվի ամբողջական եւ մանրամասն: Օրինակ՝ որտեղից ենք մեկնում, ուր ենք գնում, ով կդիմավորի, որտեղ կտեղավորեն, այնտեղ ինչպիսի պայմաններ են, ինչպես են կերակրում, ինչ է ներառված, այս կամ այն երկրում ինչ սովորություններ եւ ավանդույթներ կան, որոնք պետք է հաշվի առնել, եւ այլն»,- պարզաբանեց Հայաստանի Տուրիզմի ֆեդերացիայի նախագահը: Նաեւ պետք է նշվեն այն պայմանները, թե ինչ հանգամանքներում է սպառողի եւ տուրօպերատորի միջեւ կնքված պայմանագիրը անվավեր ճանաչվում:

Նա նշեց, որ եղել են դեպքեր, երբ տուրօպերատորները խախտել են համաձայնագիրը եւ պայմանագրով նախատեսված պատշաճ ծառայություններ չեն մատուցել:

«Նման դեպքերում քաղաքացիները կարող են իրենց միջոցները պահանջել դատական կարգով։ Բայց այդ դեպքում տուրօպերատորը կարող է կանգնել նաեւ սնանկության սպառնալիքի առջեւ։ Այդ պատճառով տուրօպերատորներին պետք է լիցենզավորել։ Նրանք պետք է համապատասխանեն այն նորմերին, որոնք գրված են օրենքում»,- ընդգծել է փորձագետը՝ հավելելով, որ քաղաքացիները, ցավոք, վատ են տեղեկացված իրենց իրավունքների մասին։

Ինչպես նշեց Մեխակ Ապրեսյանը, եղել են դեպքեր, երբ մարդիկ, որոնք կարծեք լիովին գրագետ են իրավաբանական առումով, տուրօպերատորի կողմից պայմանավորվածությունները չկատարելու պատճառով բողոք չեն ներկայացրել։