Վենեսուելայում հաստատվել է առեւտրային բանկերում արժույթի լիովին ազատ առուվաճառքը: Այս մասին նշված է երկրի Կենտրոնական բանկի հրապարակած փաստաթղթում, փոխանցում է «ՌԻԱ Նովոստի»-ն:
Վենեսուելայում 2003 թվականից արտասահմանյան արժույթները պետության խիստ հսկողության ներքո էին, իսկ դրանցով գործարքները փաստացի արգելված էին: Սա վերջնարդյունքում հանգեցրել էր արժույթի վիթխարի «սեւ շուկայի» ստեղծմանը, որտեղ դոլարը պաշտոնապես հաստատված փոխարժեքից տասնյակ անգամ բարձր էր: Միայն 2018 թվականի օգոստոսին իշխանությունները դոլարն ազատականացրին, սակայն թողեցին DICOM պաշտոնական փոխարժեքը, որը միայն վերջին ամիսներին է իրապես մոտեցել եւ նույնիսկ բարձր է «սեւ շուկայի» փոխարժեքից:
Իսկ հիմա, ինչպես հետեւում է ԿԲ փաստաթղթից, յուրաքանչյուր առեւտրային բանկ իրավունք ունի քաղաքացիներից արժույթ գնել եւ վաճառել՝ սահմանելով սեփական փոխարժեքը:
Ընդ որում՝ փաստաթղթում ոչ մի անգամ չի հիշատակվում նախկինում գոյություն ունեցած DICOM փոխարժեքը: Ավելին՝ բանկերը օրը մեկ անգամ պարտավոր են ԿԲ-ին հայտնել իրենց միջին փոխարժեքը, որոնց հիման վրա ԿԲ-ն պետք է սահմանի եւ հրապարակի արժույթի իր փոխարժեքները:
Փաստորեն, վերջին ամիսներին տեղի է ունեցել Վենեսուելայի տնտեսության դոլարայնացում: Դոլարն աստիճանաբար պաշտոնապես սկսել են ընդոնել հյուրանոցներում, ռեստորաններում, խանութներում՝ հատկապես հաշվի առնելով երկրում կանխիկ բոլիվարի լիակատար բացակայությունը:
Բանկերը արժույթի փոխանակում կարող են կատարել ոչ միայն կանխիկով, այլ նաեւ քարտի վրա փոխանցման եւ բանկի ու հաճախորդի միջեւ այլ գործարքներ կատարելու ճանապարհով:
