Շրի Լանկայի ոստիկանության աշխատակիցները երկրի կենտրոնական հատվածում հայտնաբերել են «Ջամաաթ աթ Թաուհիդ ալ Վաթանիա» խմբավորման ահաբեկիչների մարզական բազան, հայտնում է Adaderana պորտալը:
Պորտալի տեղեկություններով՝ բազան գտնվել է Նուվարա Էլիա քաղաքում երկհարկանի շենքում: Այնտեղ ուսուցում է անցել նվազագույնը 38 մարդ, ներառյալ Կոլոմբոյում ահաբեկչությունների շարքի անմիջական կազմակերպիչը: Շենքի սեփականատերը ձերբակալվել է, քննչական միջոցառումները շարունակվում են:
Ապրիլի 21-ին՝ Զատկի կիրակի, տեղի էր ունեցել երկրի պատմության մեջ ամենախոշոր ահաբեկչությունների շարքը: Ընդհանուր առմամբ Կոլոմբոյում, Նեգոմբոյում եւ Բատիկալոայում իրագործվել էր 8 պայթյուն, այդ թվում՝ կաթոլիկ եկեղեցիներում Զատկի պատարագի ժամանակ եւ հյուրանոցներում: Հաղորդվում էր 359 զոհի մասին, սակայն ավելի ուշ պարզվել էր, որ այդ տվյալները սխալմամբ մեծացվել են: Վերջին տեղեկություններով՝ ահաբեկչությունների հետեւանքով զոհվել է մոտ 250 մարդ:
Իշխանությունների կարծիքով՝ ահաբեկչությունների իրագործման հետեւում կանգնած է «Ջամաաթ աթ Թաուհիդ ալ Վաթանիա» տեղական խմբավորումը, որը, հնարվոր է, կապեր ունի արտասահմանյան իսլամական կազմակերպությունների հետ: Ներկա պահին իշխանությունները կալանավորել են արդեն ավելի քան 100 մարդու, որոնք, ենթադրաբար, ահաբեկչություններին մասնակցություն են ունեցել: