Իր դեմ խոսացողները ոչ հարեւանին օգնած կան, ոչ երկրին, ոչ էլ էլ որեւէ գործ են կատարել: Այս մասին, այսօր՝ մայիսի 7-ին, ԱԺ-ում լրագրողների հետ զրույցում նշեց ԲՀԿ խմբակցության ղեկավար Գագիկ Ծառուկյանը:
Հարցին, թե ինչո՞ւ կասկածներ առաջացան պատգամավորների մոտ, որ ինքը իսկապես ձեռնարկատիրությամբ է զբաղվում, ԲՀԿ առաջնորդը պատասխանեց. «Դա կասկած չի առաջացրել, դա նախանձն ա, որ իրենք չեն երեւում, ոչինչ չեն կարողանում անել, Ծառուկյանի քայլի վրա գալիս են, դիմում են, ուզում են Ծառուկյանի հետ անեն: Ես ինչ ասեմ: Եթե ներդրողը գնում է տարածք, ժողովուրդը չի թողնում, ասում ՝ անցած տարի մեզ խաբել եք: Ասում են՝ Ծառուկյանի հետ ենք: Ժողովուրդն էլ ասում է՝ դե թող Ծառուկյանը գա: Ես գնում, ասում եմ՝ իմ գործընկերներն են, մարդիկ ցուլ են մորթում, մատաղ են արել: Ասում եմ՝ ժողովուրդ ջան, իմ գործընկերներն են, ուզում են տեքստիլի քաղաք կառուցել, իրենք են կառավարիչները: Ասում են՝ մենակ քո խոսքը պետք է լինի, դու ասա: Ես էլ ասում եմ՝ ես պատասխանատու եմ, թող աշխատեն»:
Նա ընդգծեց, որ անգամ գիտի, թե որն է լինելու «այդ մարդկանց» հաջորդ քայլը, սակայն չնշեց, թե որն է դա լինելու:
Ավելի վաղ NEWS.am-ը հայտնել էր, որ «Քաղաքաու որոշում» կուսակցությունը դիմել էր ԱԺ նախագահին եւ գլխավոր դատախազին՝ առաջարկելով քննարկել Գագիկ Ծառուկյանին պատգամավորական մանդատից զրկելու հարցը: Սրա արձագանքել էր ԱԺ նախագահ Արարատ Միրզոյանը՝ հրապարակավ պարզաբանումներ պահանջելով Գագիկ Ծառուկյանից: Վերջինս էլ այսօր արձագանքել է ԱԺ նախագահի հայտարարությանը:
