ԱՄՆ-ը շահագրգռված է հարեւանների հետ խաղաղության մեջ ապրող Հայաստանի բարգավաճման մեջ։ Այս մասին Երեւանում կայացած ճեպազրույցում հայտարարել է ԱՄՆ պետքարտուղարի օգնականի տեղակալ Ջորջ Քենթը։ Հիշեցնենք, որ Քենթը գլխավորում է ՀՀ-ԱՄՆ ռազմավարական երկխոսության նիստին մասնակցող պատվիրակությունը։
Ջորջ Քենթի գնահատականով, նիստն անցել է բարեկամության եւ համագործակցության մթնոլորտում։ «Մենք հաստատել ենք Հայաստանի հետ աշխատելու մեր պատրաստակամությունը եւ ուզում ենք նրան բարգավաճ եւ հարեւանների հետ խաղաղ ապրելիս տեսնել»,- նշել է Ջորջ Քենթը։
Պատասխանելով այն հարցին, թե քննարկվել են արդյոք վարչապետի եւ կառավարության անդամների հետ հանդիպմանը ռազմական համագործակցության հարցեր, ԱՄՆ Պետդեպի ներկայացուցիչը նշել է, որ սա արդեն երկրորդ հանդիպումն է Նիկոլ Փաշինյանի հետ, առաջինը տեղի է ունեցել անցյալ տարվա հոկտեմբերին։ «Շատ արդյունավետ քննարկում էր։ Մենք խոսեցինք Հայաստանի զարգացման մասին, շոշափեցինք անվտանգությանը, Լեռնային Ղարաբաղին վերաբերող հարցեր։ Նախարարների հետ հանդիպումներում քննարկվել են օրակարգի բոլոր հարցերը»,- նշել է Ջորջ Քենթը։
Խոսելով նիստի շրջանակներում ստորագրված փաստաթղթի մասին, որը նաեւ նախատեսում է Հայաստանի մարզերում անգլերենի ուսուցում, Քենթը նշել է, որ ամերիկյան կողմը մտադիր է նպաստել լեզվի ուսուցմանը Հայաստանի ողջ տարածքում։ «Մեր թիմը դեսպանի գլխավորությամբ կշարունակի աշխատանքն այդ ուղղությամբ»,- ասել է Պետդեպի ներկայացուցիչը։