Իրաքը շուտով կստորագրի 53 մլրդ դոլարի չափով եւ 30 տարի ժամկետով էներգետիկ պայմանագիրը Exxon Mobil-ի եւ PetroChina-ի հետ: Այդ մասին հայտարարել է վարչապետ Ադել Աբդուլ Մահդին՝ հերքելով մեգանախագծի եւ Իրաքին՝ Իրանի հետ բիզնես վարելու մասին ԱՄՆ-ի թույլտվության միջեւ որեւէ կապը, հաղորդում է Reuters-ը:
Վարչապետը հայտարարել է, որ 30 տարվա ընթացքում Իրաքը ցանկանում է վաստակել 400 մլրդ դոլար: Նրա խոսքով՝ մեգանախագիծը ենթադրում է Նահր Բին Ումարի եւ Արտավիի նավթահանքերի զարգացումն ու այդ երկու հանքերից նավթի արդյունահանման ծավալների ավելացումը մինչեւ 500 000 բարել օրական:
Ավելի վաղ ԶԼՄ-ները հայտնել էին, որ Լոնդոնում Իրանի դեսպանը հայտարարել է, որ Միացյալ Նահանգները թույլ կտան Իրաքին տնտեսական համագործակցություն ունենալ Իրանի հետ, իսկ փոխարենը Բաղդադը կստորագրի նավթային համաձայնագիր Վաշինգտոնի հետ:
«Այժմ նավթի նախարարության եւ Exxon Mobil-ի ու PetroChina-ի միջեւ բանակցություններն ուղղված են եկամուտը կիսելու ուղիների շուրջ հարցերին, եթե նավթի գները նվազեն կամ բարձրանան»,-ասել է Աբդուլ Մահդին:
Իրաքը ՕՊԷՔ-ում նավթի արտահանման հարցում երկրորդն է մեծությամբ եւ ունի երկարաժամկետ նպատակներ նավթարդյունաբերությունն ավելացնելու հարցում, որը սահմանափակվել էր երկարատեւ պատրեազմի եւ պատժամիջոցների հետեւանքով: