Չինաստանի Արտաքին գործերի նախարարությունը կոչ է արել ամբողջությամբ կատարել Իրանի հետ միջուկային համաձայնագրի դրույթները: Այս մասին չորեքշաբթի հայտարարել է երկրի ԱԳՆ ներկայացուցիչ Գեն Շուանը, հայտնում է Reuters-ը:
Դիվանագետի խոսքով՝ գործարքի կատարման պատասխանատվությունը կրում են բոլոր կողմերը:
2018 թվականի մայիսի 8-ին ԱՄՆ նախագահ Դոնալդ Թրամփը հայտարարել էր Համատեղ համապարփակ գործողությունների ծրագրից Վաշինգտոնի դուրս գալու մասին, որը կնքվել էր 2015 թվականին եւ սահմանափակել Թեհրանի միջուկային մշակումները՝ ՄԱԿ ԱԽ պատժամիջոցների եւ ԱՄՆ ու ԵՄ միակողմանի սահմանափակող միջոցառումների չեղարկման դիմաց: Անցյալ տարվա նոյեմբերին Իրանի նավթային հատվածի դեմ ԱՄՆ պատժամիջոցները վերականգնվել էին: