Հայաստանը պետք է զարգացնի էներգիայի այլընտրանքային աղբյուրներ։ Այս մասին ասել է Հայաստանի վարչապետ Նիկոլ Փաշինյանը մայիսի 8-ի մամուլի ասուլիսում։
Պատասխանելով Մեղրիի գազիֆիկացման հեռանկարի մասին հարցին՝ Փաշինյանն ասաց, որ պետք է մտածել այլընտրանքային էներգետիկայի զարգացման մասին։ Վարչապետը հիշեցրեց, որ գազիֆիկացման համակարգում ի հայտ են եկել խնդիրներ. հարյուրավոր գյուղերի գազիֆիկացման համար ծախսվել են միլիոնավոր դոլարներ, բայց արդյունք չկա։ Գյուղաբնակները օգտագործում են գազի նվազագույն քանակ, սուրճ կամ ճաշ պատրաստելու համար։ Արդյունքում՝ ծախսերը չեն արդարացվում, իսկ բեռն ընկնում է բոլոր քաղաքացիների վրա։ «Մենք ասում ենք, որ երկիրը պետք է տեխնոլոգիապես զարգացած լինի։ Ապագան ոչ թե գազինն է, այլ էներգետիկայի վերականգնվող աղբյուրներինը»,- նշել է վարչապետը։
