Ադրբեջանը վերջին 25 տարում ինտենսիվորեն պատրաստվում է պատերազմի։ Այդ մասին այսօր՝ մայիսի 8–ին, մամուլի ասուլիսի ժամանակ ասաց վարչապետ Նիկոլ Փաշինյանը՝ պատասխանելով հարցին, որքանով է իրատեսական համարում Ադրբեջանի կողմից մարտական գործողությունների վերսկսումը, հաշվի առնելով ադրբեջանական ԶՈՒ–ի ակտիվացումը շփման գծում։

«Ադրբեջանը վերջին 25 տարում ինտենսիվորեն պատրաստվում է պատերազմի։ Ու այդ պատերազմը մենք, ըստ էության... եթե կրակոցներ ենք ունենում ամեն օրյա ռեժիմով, էական չէ շատ թե քիչ, նշանակում է, որ մենք պատերազմական կամ կիսապատերազմական վիճակի մեջ ենք։ Ընդհանուր առմամբ, այո, վերջին շրջանում, վերջին երկու ամսում դեպքերի, որոշ օրերին լարում է նկատվում, բայց ես ուզում եմ ասել, որ ընդհանուր առմամբ, կայունությունը եւ հանդարտությունը պահպանվում է։ Մենք հիմա հետեւյալ իրավիճակի մեջ ենք. հաղորդակցության ուղիներ են հաստատված իմ եւ Ադրբեջանի նախագահի միջեւ, եւ հիմա, ես այս շրջանում փորձում եմ հասկանալ ՝ ինչ է կատարվում, ինֆորմացիաներ ենք փոխանակում, մտահոգություններ ենք փոխանակում, իհարկե, ինչպես միշտ այդտեղ կան փոխադարձ մեղադրանքներ։ Եվ ես հույս ունեմ, որ մեզ կհաջողվի այս իրավիճակը հասկանալ, թե ինչ է կատարվում եւ  ինչու է կատարվում։ Եվ ես մեր վիրավոր զինվորներին մաղթում եմ շուտափույթ ապաքինում»,– ասաց Փաշինյանը։

Հարցին, թե արդոք կիսում է փորձագետների կանխատեսումը, որ Ադրբեջանը մտադիր է վերսկսել մարտական գործողությունները, Փաշինյանը կրկին նշեց, որ վերջին 25 տարում Ադրբեջանը ինտենսիվ նախապատրաստվում է ռազմական գործողությունների. «Դա կա, եւ ոչ մի բան այդ առումով չի փոխվել, եւ քանի դեռ հարցը կարգավորված չէ, չի փոխվելու։ Սա նշանակոմ է, որ այդ ինֆորմացիան ես, ՀՀ ՊՆ եւ Գլխավոր շտաբը եւ բոլորս դա գիտենք։ Դա ի գիտություն է ընդունվում։ Վիեննայի հայտարարությանը բոլոր կողմերը պետք է հավատարիմ մնան, իսկ այնտեղ մենք արձանագրել ենք, որ հրադադարի ռեժիմը պետք է պահպանվի եւ ամրապնդվի։ Հիմա մենք պետք է հասկանանք՝ ինչ է տեղի ունենում, ինչու է տեղի ունենում։ Արդյոք կողմերից մեկը տվել է հրաման ապակայունացնել իրավիճակը, եթե ոչ՝ ինչու է ապակայունանում իրավիճակը։ Չնայած ես չէի անվանի դա ապակայունացում, որոշ օրերի որոշակի միջադեպեր են արձանագրվում։ Ադրբեջանական կողմը նույնպես ինֆորմացիա է տրամադրում, որ որոշակի միջադեպեր են գրանցվում, փոխադարձ մեղադրանքներ կան եւ մենք պետք է աշխատանքային կարգով փորձենք հասկանալ ԵԱՀԿ քարտուղարի անձնական ներկայացուցչի միջոցով կոմունիկացիաները փորձում ենք ապահովել, եւ արդյունքում կանենք մեր եզրակացությունները»։