Երբ ես խոսել եմ խոշոր սեփականատերերի մասին, դա ասել եմ օլիգարխների մասին հարցին ի պատասխան: Այս մասին այսօր՝ մայիսի 8-ին, իր մեծ ասուլիսում հայտարարեց ՀՀ վարչապետ Նիկոլ Փաշինյանը՝ անդրադառնալով նրան, որ «Քաղաքացու որոշում» կուսակցությունը դիմել է ԱԺ նախագահին եւ գլխավոր դատախազին՝ ԲՀԿ առաջնորդ Գագիկ Ծառուկյանին պատգամավորի մանդատից զրկելու պահանջով:
Լրագրողի դիտարկմանը, որ ինքն ասել է, որ Հայաստանում օլիգարխներ չկան, կան խոշոր սեփականատերեր, ինչը վերաբերում է նաեւ Ծառուկյանին, վարչապետն արձագանքեց. «Ես հայտարարել եմ, որ Հայաստանում օլիգարխներ չկան եւ դրա համար քննադատության եմ արժանացել, որովհետեւ ասել են՝ հենա, հեսա:
Օլիգարխիա նշանակում է քչերի իշխանություն, օլիգարխ նշանակում է մարդ կամ մարդիկ, որոնք ունեն իշխանության որոշումների վրա ազդեցություն ունենալու լծակներ:
Այդ իմաստով Հայաստանում օլիգարխ չկա: Հայաստանում այդպիսի մարդ չկա, որ գա մտնի իմ սենյակ եւ ասի՝ այ էս հարցը պետք է այսպես լուծես: Ցանկացած քաղաքացի կարող է փաստարկ ներկայացնել ու ասել՝ էս, էս փաստարկներով ճիշտ լուծումը սա է, եւ ես հաճույքով կընդունեմ: Բայց Հայաստանում քչերի իշխանություն չկա: Հայաստանում շատերի իշխանության տրամաբանությունն է»:
Ինչ վերաբերում է Գագիկ Ծառուկյանի վերաբերյալ ՔՈ կուսակցության դիմումին, Փաշինյանն ասաց. «Դիմումը տրվել է, ընթացակարգերով պետք է քննարկվի, թող որոշում կայացվի: Դա իրավական հարց է: Ես այդտեղ քաղաքական ենթատեքստ չեմ տեսնում»: