Պարսից ծոց նավեր ուղարկելու ԱՄՆ մտադրությունը ցավալի է, ասել է ՌԴ արտաքին գործերի նախարար Սերգեյ Լավրովը, տեղեկացնում է ՌԻԱ «Նովոստի»-ն։
«Ինչ վերաբերում է տարածաշրջանում իրավիճակի թեժացմանը եւ իր ավիակիրները Պարսից ծոց ուղարկելու ԱՄՆ մտադրությանն ու առհասարակ այնտեղ իր ռազմական ներկայությունն ուժեղացնելուն՝ ակնարկելով ուժ կիրառելու պատրաստականության մասին, գիտեք, դա արդեն մեր ամերիկյան գործընկերների վարքագիծն է դարձել՝ լինի Մերձավոր Արեւելքում, Պարսից ծոցում, թե Վենեսուելայի հանդեպ։ Այդ ամենը ցավալի է։ Եվ երեկ չէ առաջին օրը, հանդիպելով ԱՄՆ պետքարտուղար Մայք Պոմպեոյի հետ Ֆինլանդիայում, ես կոչ արեցի նրան, այնուամենայնիվ, բոլոր խնդրահարույց հարցերի շուրջ օգտվել դիվանագիտության գործիքներից, այլ ոչ թե սպառնալիքներից, եւ խստորեն ղեկավարվել միջազգային իրավունքով»,- ասել է Լավրովը։
ԱՄՆ նախագահի ազգային անվտանգության հարցերով խորհրդական Ջոն Բոլթոնը ավելի վաղ տեղեկացրել էր, որ ԱՄՆ-ը Իրանի ափեր կուղարկի «Աբրահամ Լինքոլն» ավիակիրը եւ ռմբակոծիչներ։ Նրա խոսքով՝ այդկերպ Վաշինգտոնը «պարզ ու անսխալ ազդանշան է ուղարկում իրանական ռեժիմին այն մասին, որ ցանկացած հարձակում Միացյալ Նահանգների կամ մեր դաշնակիցների շահերի հանդեպ կհանդիպի անխնա ուժի»։