2019 թվականին կվերանորոգվի Սեւանա լճից Լեռնային Ղարաբաղ տանող ճանապարհը: Մայիսի 8-ին ԱԺ-ում կառավարության ժամին այս մասին ասաց տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը՝ պատասխանելով պատգամավորների հարցերին:
Այսպես, նրա խոսքով, Սեւանա լճի շուրջ կվերանորոգվի մոտ 40 կմ ճանապարհ՝ հանգստավայրային բնակավայր Շորժայից մինչեւ Վարդենիս: «Այնհուհետեւ այս ճանապարհը միանում է Լեռնային Ղարաբաղ տանող նոր մայրուղուն: Ընդ որում՝ 54 կմ ճանապարհ կվերանորոգեն Տավուշի մարզում, այդ թվում՝ Կիրանց, Բերքաբեր, Ոսկեպար, Բաղանիս, Այգեպար սահմանամերձ գյուղերում»,- պարզաբանեց Արշակյանը:
Նա, միաժամանակ, նշեց, որ մնացած 8 մարզերում կվերանորոգվի մի քանի տասնյակ կիլոմետր ճանապարհ: «Ընդհանուր առմամբ, բոլոր մարզերում՝ ավելի քան 300 կմ: Մենք այս ծավալը կմեծացնենք միջոցների հաշվին, որոնք կտնտեսենք պետական մրցույթներում»,- եզրափակեց նախարարը: