Վերջին օրերին սահմանին իրադարձությունների վտանգավոր զարգացում է նկատվում, բայց մենք անհրաժեշտ ամեն բան անում ենք, որպեսզի վերահսկենք իրավիճակը։ Այս մասին մայիսի 9-ին NEWS.am-ի թղթակցի հետ զրույցում ասաց Հայաստանի արտաքին գործերի նախարար Զոհրաբ Մնացականյանը։
Նախարարը նշեց, որ վերջին օրերին տեղի ունեցած միջադեպերը մտահոգություն են առաջացնում, բայց ձեռնարկվում են ձեռք բերված պայմանավորվածությունների վերահսկման քայլեր։ «Մենք սեւեռուն հետեւում ենք իրավիճակին»,- ընդգծել է Մնացականյանը։
Պատասխանելով Հայաստանի եւ Արցախի միջեւ ռազմավարական դաշինքի կնքման հնարավորության հարցին՝ ԱԳՆ ղեկավարը նշեց, որ այդ հարցը բազմակողմանի քննարկման կարիք ունի, այդ թվում հանրության կարծիքի հաշվառմամբ։ Նա մատնանշեց, որ Հայաստանի եւ Արցախի խոր եւ ամուր կապը հիմնվում է այդ թվում նաեւ այն սկզբունքի վրա, որ Արցախը մեր հայրենակիցների հայրենիքն է։ «Հայաստանը եղել եւ մնում է Արցախի բնակչության պաշտպանության միակ երաշխավորը։ Մենք բավականաչափ միջոցներ ունենք Արցախի Հանրապետության անվտանգության երաշխիքներ ապահովելու համար»,- նշել է նա։