Ասել այն մասին, որ մենք վստահ էին հաղթանակի մեջ, սուտ կլիներ, քանի որ Շուշիի գրոհի ժամանակ լիակատար անորոշություն էր: Ստեփանաակերտի հրապարակում NEWS.am-ի թղթակցի հետ զրույցում այս մասին ասաց Արցախի հերոս, գեներալ-մայոր Արկադի Տեր-Թադեւոսյանը:
Նրա խոսքով՝ այդ օրերին ուժերի հարաբերակցությունը անհավասար էր:
«Բայց մենք հաղթեցինք: Հետո ես նորից սկսեցի զբաղվել պատմությամբ եւ կարդացի չինացի զորահրամանատար Սուն Ցզիին, որը ասում էր, որ ով բարձր բարոյական ոգի ունի, նա երեք անգամ ուժեղ է հակառակորդից: Այդ մարտական ոգին մեզ մոտ մի քիչ ավելի շատ ստացվեց՝ 4 անգամ շատ», - ասաց Արկադի Թադեւոսյանը:
Գեներալ-մայորն ընդգծեց, որ այդ օրերին հայ ժողովուրդը միասնական էր, ինչը կարեւոր էր պատերազմի օրերին եւ այժմ նրա կարծիքով պետք է ուժեղ լինել եւ ամրապնդել բանակը:
Հիշեցնենք, որ Շուշիի գործողությունն անցկացվել է 4 ուղղություններով, «Հարսանիք լեռներում» գործողությունը ղեկավարում էր Արկադի Տեր-Թադեւոսյանը (Կոմանդոս):1991 թվականի նոյեմբերից մինչեւ 1992 թվականի մայիս Ստեփանակերտի ուղղությամբ արձակվել էր մոտ 4740 արկ, դրանցից մոտ 3 հազարը «Գրադ» համակարգերից:Զոհվել, վիրավորվել էին հարյուրավոր մարդիկ, ավերվել մի քանի հարյուր շենք: Շուշիի գործողությունը տեւել էր 26 ժամ եւ քաղաքի ազատագրումից հետո ադրբեջանական կողմը կորցրել էր գերիշխող բարձունքը: Չնայած հակառակորդի գերազանցող ուժերին՝ հայ զինվորների քաջության եւ հերոսության շնորհիվ մայիսի 9-ին Շուշիին վերջնականապես ազատագրվեց: Գործողությունն իր մտահաղացմամբ եւ կատարմամբ բացառիկ է: Հայկական բանակը 56 զոհ էր տվել, ադրբեջանցիները՝ մոտ 300 զոհ եւ 700 վիրավոր: Եւս 13 մարդ գերեվարվել էր:
