Կորեական թերակղզում խնդիրները պետք է լուծվեն երկխոսության միջոցով, եւ բոլոր կողմերը պետք է աջակցեն նրա ապամիջուկայնացման նպատակին: Այս մասին հայտարարել է Չինաստանի արտաքին գործերի նախարար Վան Ին`ելույթ ունենալով Չինաստանի, Ճապոնիայի եւ Հարավային Կորեայի միջեւ եռակողմ համագործակցությանը նվիրված միջոցառմանը, հաղորդում է Reuters-ը:
Նրա խոսքով՝ կորեական հարցում ընդգրկված բոլոր երկրները պետք է ձգտեն գործնական ճանապարհային քարտեզի ստեղծմանը բոլոր խնդիրների լուծման համար:
Հարավային Կորեայի զինված ուժերի տվյալներով՝ նախօրեին Հյուսիսային Կորեան փոքր հեռահարության երկու հրթիռ էր արձակել:
Հիշեցնենք, որ փետրվարին Հանոյում ԱՄՆ-ի եւ Հյուսիսային Կորեայի առաջնորդների հանդիպումը արդյունք չէր տվել:
Պարզվել էր, որ Վաշինգտոնը եւ Փհենյանը չեն կարողացել համաձայնության գալ Հյուսիսային Կորեայի նկատմամբ պատժամիջոցների մասնակի չեղարկման վերաբերյալ: Դրանից հետո, Փհենյանը հայտարարել էր, որ Վաշինգտոնն իրեն գանգստերի պես է պահում եւ սպառնացել էր վերսկսել հրթիռային փորձարկումները:
Մայիսի 9-ին Թրամփը հայտարարել էր, որ Փհենյանը պատրաստ չէ բանակցություններին: