Ինձ հետաքրքիր է, թե ինչպե՞ս եք հաշվարկել, որ Կովկասյան ընձառյուծի որս անողների համար տուգանքը դարձրել ենք 100 մլն դրամ. որս անողները այդքան հարուստ չեն, որ այդ գումարը վճարեն: Այս մասին, այսօր՝ մայիսի 10-ին, կառավարության նիստում, «Բնապահպանական իրավախախտումների հետեւանքով կենդանական եւ բուսական աշխարհին պատճառված վնասի հատուցման սակագների մասին» օրենքում փոփոխության նախագծի քննարկման ժամանակ նշեց ԱԻ նախարար Ֆելիքս Ցոլակյանը:
Նշենք, որ օրինագիծը նախատեսում է տուգանքը 3 մլն դրամից դարձնել 100 մլն դրամ:
Ի պատասխան ՀՀ վարչապետ Նիկոլ Փաշինյանն ասաց. «Ճիշտ տրամաբանություն չի ասել՝ եկեք այնպիսի տուգանք դնենք, որ մարդը գնա խփի, հետո կարողանա վճարել: Բա էսքան քննարկում ենք, որ այդ մարդը հասկանա, որ չպետք է խփի: Որովհետեւ եթե խփեց, կարող ա նստի էլ, կարող ա տունն էլ առգրավեն, մեքենան էլ առգրավեն, հողամասն էլ առգրավեն: Պետք է մարդիկ դա հասկանան: Նույնը ճանապարհային խախտումների մասով: Ասում ենք՝ խնդիր չկա, արագությունը 100կմ/ժամ է, 300 քշի, վճարի, ինչքան ուզում ես քշի»:
Նա շրջվեց ֆինանսների նախարար Ատոմ Ջանջուղազյանի կողմն ու կատակեց. «Ջանջուղազյանն ասում է 100 մլն-ը քիչ է»: