ՄԱԿ-ում Իրանի դեսպանը սուտ է անվանել ԱՄՆ-ի պնդումն այն մասին, թե Թեհրանը, իբր, կանաչ լույս է տվել Մերձավոր Արեւելքում ամերիկյան ուժերի վրա հարձակվելու համար:
NBC News-ին տված հարցազրույցում դեսպան Մաջիդ Թահթ Ռավանչին հերքել է Թրամփի վարչակազմի հայտարարություններն այն մասին, որ Թեհրանը բարձր վտանգ է ներկայացնում տարածաշրջանում ԱՄՆ-ի շահերի համար:
«Այդ մեղադրանքները ներկայացնում են նույն մարդիկ, որոնք ԱՄՆ-ի Իրաք ներխուժելու նախաշեմին նույնն էին անում», - ասել է Ռավանչին՝ ակնհայտ ակնարկելով ազգային անվտանգության խորհրդական Ջոն Բոլթոնին, ով ԱՄՆ-ի Իրաք ներխուժելու ժամանակ աշխատում էր Ջորջ Բուշ կրտսերի վարչակազմում:
«Այսպիսով մենք հերքում ենք այդ պնդուները: Եվ այս բոլոր հայտարարությունները կեղծ տեղեկություններ են», - ասել է իրանցի դիվանագետը:
Նշենք, որ ԱՄՆ-ն նոր պատժամիջոցներ է կիրառել Իրանի դեմ, որոնք վերաբերում են մետաղագործական արդյունաբերությանը: Մինչ այդ Վաշինգտոնը հայտարարել էր, որ Մերձավոր Արեւելք է ուղարկում է ավիակիրներ եւ ռմբակոծիչներ որպես «նախազգուշացում» Թեհրանին: ԱՄՆ վարչակազմը պնդում է, որ Թեհրանը իբրեւ թե հարձակումներ է նախապատրաստել տարածաշրջանում ԱՄՆ զինվորականների վրա:
Նշենք, որ նախօրեին Թրամփը չէր բացառել Իրանի հետ ռազմական առճակատումը:
Սակայն նա Իրանի ղեկավարներին կոչ էր արել նստել բանակցային սեղանի շուրջ եւ քննարկել նոր պայմանագիրը:
Մայիսի 8-ին նախագահ Հասան Ռոհանին հայտարարել էր, որ Իրանը դադարեցնում է միջուկային համաձայնագրի շրջանակներում իր պարտավորությունների կատարումը:
Իրանն այլեւս չի հետեւի սահմանափակումներին, որոնք համաձայնագրով սահմանվել էին հարստացված ուրանի եւ ծանր ջրի պահպանման համար:
Համաձայնագրի մնացած կողմերին 60 օր է տրվել ԳՀՀԾ շրջանակում իրենց պարտավորությունների կատարման համար, որոնք հատկապես կապված են բանկային եւ նավթային հատվածների հետ:
