Կալիֆոռնիայի համալսարանից մի խումբ գիտնականներ պարզել են, որ տնային պայմաններում պատրաստված կերակուրը կարող է վնաս հասցնել կատուների առողջությանը, հաղորդում է Planet-today-ը՝ հղում անելով Journal of the American Veterinary Medical Association-ին:
Գիտնականները հիմնավորել են իրենց եզրակացությունները՝ ուսումնասիրելով ընտանի կենդանիների համար կերակուր պատրաստելու 114 եղանակներ եւ բաղադրատոմսեր, որոնք վերցված էին հայտնի խոհարարական գրքերից եւ համացանցից:
Պարզվել է, որ կատուների համար տնական բաղադրատոմսերի 7 տոկոսի բաղադրության մեջ ներառված են այնպիսի բաղադիչներ, ինչպիսիք են սխտորն ու սոխը: Մինչդեռ դրանք հակացուցված են կատուներին, քանի որ նրանց վրա շատ տոքսիկ ազդեցություն կարող են թողնել:
Բացի այդ, բազմաթիվ կերակուրների բաղադրատոմսերում պարունակող միսը եւս կարող է վնասել տնային կենդանիներին, քանի որ այն պարունակում է նրանց օրգանիզմի համար վտանգավոր մանրէներ եւ մակաբույծներ:
Հետազոտողները նաեւ նշում են, որ կատվազգիների համար պատրաստվող կերակուրների մեջ օգտակար նյութերի պարունակությունը շատ ցածր է:
Ընդ որում՝ փորձագետները նշել են, որ առավել օգտակար էին անասնաբույժերի կողմից պատրաստված կերակուրները, սակայն դրանք էլ լավագույնս չէին բավարարում կենդանիների սննդային պահանջմունքները: