Բելառուսը «Դրուժբա» նավթատարով աղտոտված նավթի մատակարարման պատճառած վնասի գումարը կհայտնի նավթավերամշակման գործարաններում ստուգումից հետո: Այսօր այս մասին հայտարարել է Բելառուսի նախագահ Ալեքսանդր Լուկաշենկոն՝ պատասխանելով լրագրողների հարցերին, փոխանցում է ԲԵԼՏԱ-ն:
Նա շեշտել է, որ տեղի ունեցածը չափազանց բացասաբար է գնահատում: «Ռուսաստանի տարածքում (իսկ դա հազարավոր կիլոմետրեր է) անկազմակերպվածություն ու անկարգապահություն՝ եւ ահա, ահռելի խողովակը աղտոտված է թունավոր նավթով,- ասել է Բելառուսի նախագահը: - Մեկ շաբաթում, ինչպես մասնագետներն են ասում, 4-5 մմ-ով քայքայում է անգամ խողովակը, որով մղվում է նավթը»: Ինչ վերաբերում է վնասի կոնկրետ գումարին, այն առայժմ հայտնի չէ, բայց ակնհայտ է, որ շատ մեծ կլինի:
«Այդ գումարի չափը հիմա չեմ կարող ասել: Այն վերջնականապես հայտնի կլինի այն բանից հետո, երբ կստուգենք այն, ինչ տեղի է ունեցել նավթավերամշակման գործարաններում, իսկ հիմա մենք հաշվարկում ենք վնասները»,- պարզաբանել է Ալեքսանդր Լուկաշենկոն: Վնասների հաշվարկի համար անհրաժեշտ է գնահատել սարքավորումների վնասման աստիճանը: «Հիմա մենք գնահատում ենք վնասը: Սովորաբար գործարանները հերթով 1-1,5 ամսով կանգնեցնում ենք եւ ամեն տարի սկսում ենք այն մաքրել: Ստուգում կանցկացնենք, եւ գնահատականն արդեն վերջնական կլինի»,- նշել է երկրի նախագահը: