Կառավարությունը որոշում է կայացրել արտոնություններ տալ տոհմային անասունների բուծմանը, այդ ծրագիրը միայն խոշոր եղջերավորների համար է. ոչխարներն ինչո՞վ են պակաս կովերից: Այս մասին, այսօր՝ մայիսի 11-ին, «Իմ քայլը՝ հանուն Գեղարքունիքի մարզի» գործարար համաժողովում դիմելով ՀՀ վարչապետին նշեց Լանջաղբյուր գյուղի բնակիչ Սերգո Բազեյանը:
Նա տեղեկացրեց, որ որոշել է ոչխարներ ներմուծել Ռուսաստանից, սակայն դժգոհեց, որ հողերի պակաս կա:
Նիկոլ Փաշինյանն ի պատասխան նշեց, որ Հայաստանում շուրջ մեկ մլն հա արոտավայր կա, որից վարձակալության հանձնված է 320 հազարը. «Հայաստանից տարեկան 500 հազար տոննա գառան մսի արտահանման ներուժ կա: Տարբեր երկրենրից Հայաստան գառ են բերում, ու արտահանում: Այնպես որ ոչխարաբուծությունը Հայաստանում մեծ ներուժ ունի»,-ասաց նա:
Ինչ վերաբերում է տոհմային անասունների խնդրին, վարչապետն առաջարկեց պատասխանը լսել համաժողովին ներկա Գյուղատնտեսության փոխնախարար Արտակ Քամալյանից։ Վերջին տեղեկացրեց, որ մի երկու ամսից Կառավարությանը կներկայացվի նոր ծրագիր, որտեղ կանդրադառնան նաեւ այդ խնդիրներին. «Աշնանը պատրաստ կլինի, եւ ժողովուրդը կկարողանա օգտվել»։