Ամերիկյան Հյուսիսային Կարոլինա նահանգում Բլեք-րիվեր գետի ափի ծառերն ուսումնասիրող գիտնականները հայտնաբերել են ճահճային նոճի (Taxodium distichum), որն առնվազն 2624 տարեկան է, հաղորդում է Live Science-ը:
Այդկերպ այդ ծառն աշխարհում ամենահինն է բնական ճանապարհով վերարտադրվող ծառերի շրջանում:
Հետազոտությունը հրապարակվել է Environmental Research Communications պարբերականում:
Նոր հետազոտության արդյունքների համաձայն՝ գիտնականները եկել են եզրահանգման, որ ճահճային նոճիներն ավելի հին են, քան նրանք կարծել են: Ի լրումն իրենց ուշագրավ գտածոյի՝ գիտնականները նաեւ հայտնաբերել են այդ զարմանահրաշ ծառի ավելի երիտասարդ նմուշը, որը շուրջ 2088 տարեկան է:
Հետազոտողների կարծիքով՝ այդ վայրերում կարելի է հայտնաբերել 2000 տարեկանից բարձր ճահճային նոճիների նմուշներ, իսկ նրանք դեռեւս հասցրել են ուսումնասիրել եւ որոշել միայն 100 նմուշների տարիքը:
