Ես Հայաստանի քաղաքական կամ ընդդիմադիր դաշտում քաղաքական ուժ չեմ տեսնում, որը դաշինք կստեղծեր Հայաստանի երկրորդ նախագահ Ռոբերտ Քոչարյանի հետ: Մայիսի 13-ին Ազգային ժողովում ավանդական ճեպազրույցների ժամանակ նման կարծիք հայտնեց Պաշտպանության եւ անվտանգության հարցերով մշտական խորհրդարանական հանձնաժողովի նախագահ, «Իմ քայլը» դաշինքից պատգամավոր Անդրանիկ Քոչարյանը:
Նրա խոսքով՝ ներկայումս կարող են լինել միայն Ռոբերտ Քոչարյանի ընտանիքի անդամների եւ նրանց ենթարկվող լրատվամիջոցների հետ հանդիպումները:
«Հնարավոր է նման դաշինք ստեղծվել է մեկուսարանում այս վերջին ամիսների ընթացքու՞մ: Բայց այդ մասին նույնպես տեղեկություն չկա», - ասաց նա:
Նա նշեց, որ ընդդիմության ներկայացուցիչներն՝ ի դեմս «Բարգավաճ Հայաստան» եւ «Լուսավոր Հայաստան» կուսակցությունների այժմ ընդգրկված են խորհրդարանում: Այս առումով պատգամավորը չբացառեց, որ ամենայն հավանականությամբ, խոսքը արտախորհրդարանական ընդդիմության հետ դաշինքի ձեւավորման մասին է:
«Սակայն ինձ համար դա դեռեւս ակնհայտ չէ: Եթե այն ձեւավորվի եւ այդ մասին հստակ հայտարարություն արվի, ապա այդ ժամանակ կհասկանանք ինչին է այդ ամենն ուղղված՝ Քոչարյանի պաշտպանության ամրապնդմանը, թե քաղաքական տարածության եւ մեր երկրի պետական անվտանգության համակարգի ամրապնդմանը», - ընդգծեց նա:
