Մարտի մեկի մայր գործով մինչ այս պահը որևէ մեկին մեղադրանք է չի առաջադրվել։ Այս մասին այսօր՝ մայիսի 13–ին, Քոչարյանի և մյուսների գործով նախնական դատական նիստից հետո հայտարարեց Մարտի մեկի գործով տուժողների իրավահաջորդների ներկայացուցիչ, փաստաբան Վահե Գրիգորյանը։

NEWS.am–ի հարցին, թե մայր գործով որևէ տեղաշարժ կա՞, արդյոք հայտնի՞ են 10 զոհերի սպանության մեղավորները, Գրիգորյանը պատասխանեց.

«Մայր գործով որևէ մեկին մեղադրանք չի առաջադրվել, չգիտեմ, թե այդ գործով քննչական աշխատանքն ուր է հասել, բայց գիտեմ, որ գործով բավականին ինտենսիվ քննություն է ընթանում»։

Նշենք, որ Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործն անջատվել է դեռեւս 2008 թվականին հարուցված եւ ՀՀ հատուկ քննչական ծառայությունում քննվող բուն քրեական գործից։

Քոչարյանի և մյուսների գործը վերաբերվում է 2008 թվականի մարտի 1-ից 2-ն ընկած ժամանակահատվածին, ավելի կոնկրետ՝ Հայաստանի Հանրապետության Սահմանադրական կարգը բռնությամբ տապալելու դեպքին։

Քրեական գործը Հատուկ քննչական ծառայությունում հարուցվել է նախորդ տարվա հուլիսի 3-ին։