Ես ոտքերս ոչ մի երկրի դրոշի վրա չեմ սրբել, ակցիայի ժամանակ դրոշը հայտնվել է գետնին, բայց աբսուրդ է այդ կոնտեքստով դա ներկայացնելը: Այս մասին ֆեյսբուքյան ուղիղ եթերում հայտարարեց Արագածոտնի մարզպետ Դավիթ Գևորգյանը՝ արձագանքելով ԼՀԿ նախագահ Էդմոն Մարուքյանի քննադատությանը, թե ակցիայի ժամանակ տրորել է ՌԴ դրոշը։
«Ես ոտքերս ոչ մի երկրի դրոշի վրա չեմ սրբել, այո, այդ ակցիայի ժամանակ դրոշը հայտնվել է գետնին, ինչ-որ դրվագում այդ դրոշի վրա ոստիկան էլ է կանգնած եղել, բայց իմ խորին համոզմամբ՝ ոստիկանն էլ չէր մաքրում կոշիկները դրոշի վրա, աբսուրդ է այդ կոնտեքստով դա ներկայացնելը, էլ չեմ ասում, որ ներկայացնում են, որ Արագածոտնի մարզպետն է դա արել»,- ասաց նա:
Դավիթ Գեւորգյանը հիշեցրեց՝ բողոքի ակցիան տեղի է ունեցել 2015 թվականի հունվարի 15-ին Գյումրիում Ավետիսյանների ընտանիքի սպանդից հետո։ Մարզպետը ընթերցեց այդ օրերին արած իր գրառումը՝ ցույց տալու, որ հակառուսական որեւէ տրամադրություն չի ունեցել։ Նույն գրառման մեջ նա Պերմյակովին հիշել էր «անասուն» բառով եւ հիմա, ասաց, չի զարմանա, եթե այդ բառի համար Էդմոն Մարուքյանն իրեն դատի տա։
Նա հայտարարեց, որ Մարուքյանի այդ գործողությունը դրսից մարդ բերելու տպավորություն է թողնում եւ դիմեց նրան․ «Ում եք ծառայում ձեր այս գործունեությամբ, պարոն Մարուքյան»։
Գեւորգյանը նաեւ անդրադարձավ Մարուքյանի անցած ճանապարհին, ասաց, որ չի մոռացել նրա երրորդ ճանապարհը․ «Ձեր երրոդ ճանապարհը չկար ու գոյություն չուներ, ձեր երրորդ ճանապարհը այլեւայլ տեղերում էր գծվել ու որոշվել, որը մերժեց ժողովուրդը անվերադարձ։
Հիմա էլ ձեր երկրորդ ճանապարհը չկա ու չի լինելու»,- ասաց նա։
Մարզպետ Գեւորգյանը հերքեց նաեւ իր անվանն առնչվող այլ տեղեկություններ, հայտարարեց, որ երբևիցե «Yandex» տաքսի չի վարել, եւ ոչ էլ գազալցակայանում ձեռքերին ազատություն է տվել ՀԴՄ չստանալու համար:
Հիշեցնենք , որ ԼՀԿ նախագահ Էդմոն Մարուքյանը մի քանի օր առաջ ֆեյսբուքյան գրառում էր արել՝ անթույլատրելի համարելով, որ ՌԴ դրոշը տրորած մարդը ՀՀ-ում բարձրաստիճան պաշտոն է ստացել։
